稻草人
肥神仙: (白)
得閒無事，四海雲遊，咁就夠好啦，唉吔
(唱小桃紅)
我不是濟顛，
我不是鐵禪，
一唔食狗兼之更不食煙，
扮個書生拈把白紙扇，
下凡路咁遠，
幾番想過潺後轉，
不過心好為善，
點化俗子嘆工作未完，
落到荒山就有彎轉
(白)
吾乃漢鍾離是也，奉了玉皇之命，下凡考察，現身說法，有乜刮龍邪臣，與共貪污菩薩，辣辣噠噠走埋一笪，我就一於亂摑，繩之於法，有乜傻佬笨伯，即如好似呀蘭賣豬，一千唔賣賣八百，我一定將佢教精，否則佢就會連飯都冇得吃，有乜浪蝶狂蜂與脂粉客，色膽猖狂我就拍姜咁拍，好啦好啦，嚟到太平山，充正江湖客，救世救民，難辭其責，
(板眼)
行到氹氹轉，
兩頭捐，
途經元朗又到沙田，
遠望呢個農場，
禾田一片，
禾生九穗，
真令我喜地歡天，
又只見禾雀亂飛，
一定係想搏亂頂啦，
若不將佢嚟驅逐，
容乜易鬼曬啲禾田
(見稻草人白)
唓，擔心小樣啦，我攞嚟擔心，原來個邊有人看住嘅，橫掂得閒亂貢，走埋去打下牙較咋，呢位先生，仁兄，鄉里，點解問極唔聲，行埋啲睇真嚇，(行前愕然介) 啊，呢個唔係人嚟，不過整成一個人咁樣，天生冇呢亭咁嚟，系乜嘢嚟硬明白嘅，
(唱月兒像檸檬)
我肥神系眼矇，
呢個系乜嘢咚咚，
佢兩手搖搖動動，
趁著風吹鬱鬱貢，
等的雀仔見到就各散西東，
佢就怕被人生㓥拈去煎逢，
嘆孖啫拈去做餸，
肥神仙配服田農，
能把良謀運用，
種熟了禾田不驚的雀亂碰
(木魚)
睇佢有頭又冇耳仔，
又冇雙眼，
(白)
叫佢睇乜嘢呢
(接唱)
點能分辨黑暗光輝；
佢冇口又點能傾偈，我都鄧佢好難為。
佢又冇鼻哥又點得鼻涕；
佢究竟係人抑或系鬼，實在叫做乜東西。
(行前望真續唱)
哦，原來佢用禾桿紮成，重假過的木頭公仔；
插田中嚇雀仔，呢個就係叫做稻草人嚟。
(白)
嚇，呢個稻草人都幾有趣噃，的風吹嚇佢就鬱鬱嚇，等的雀當佢係真人辦，就唔敢飛埋去食禾花，好，等本神仙念在忠心為主，賜的福畀你至得，
(二王)
賜你慧眼一雙，
等你見嚇人間一切；
(念咒白)
稻草假人，忠心可讚，保護農產，功在世間，幸有仙緣，賜雙慧眼，待我念動真言，不理鬼反，請到天皇巨星，舞台花旦，義大利肉彈，羅路煲裂雞蛋，銀壇壞蛋，銀壇壞蛋，原子彈，核子彈，等你有眉有眼，睇透人間，急急如律令，變，得咗，
(唱戲水鴛鴦)
有對神仙眼，
此後能分辨，
有雀仔飛到禾田作反，
你才去將佢嚟驅散，
冇雀呢就以偷嚇懶，
你學就學望嚇，
個對飛來雁，
雙雙對對，
親親愛愛不離散
(白)
稻草人，而家你睇到丫嗎，聽到添啦係咪，(閉目失笑介) 哈哈，乜我自己咁傻瓜，唔怪得佢眨下眨下隻眼，眼光光啦，佢都未有耳仔，又點會聽我講呢，嚟啦為人為到底，送佛送到西，(喃喃念白) 耳乃聽官，豈能無耳，阿聾送殯，不理不知，笑罵由人，塞裡雙耳，待我念動真言，請到魯班先師，騎牛老子，琉璜馬師，火山孝子，歐西羅絲，東洋代子，甜椰絲，酸提子，ABCDEFG，開花結子，急急如律令，(大喝介) 變，得咗，而家有眼又有耳，
(唱岷江夜曲)
你又有雙耳，
應該聽道理，
俾心機，
不應惹事非，
有時望飛機，
咪亂當雀高飛，
佢非偷吃禾田你不必理，
佢每天裝客航行幾千里
(減字芙蓉下句)
呢對神仙順風耳，我義贈不容辭。
雙耳可聽八方，自古話隔牆防有耳；
(白)
講嘢唔好笠亂講知嘛，
(接唱)
有陣耳聞勝過目睹，因為一講你便知。
(花上句)
你聽嚇有班村女唱山歌，
(白)
嘩，芳腔，女腔，仙腔，雞腔，鴨腔，霸腔，乜腔都有……，
(接唱)
婉轉鶯喉真悅耳；
(白)
稻草人聽幾好聽，又係盞口徙氣，
(三腳凳)
原來佢未有口，難以對答如流。
我平素好助人，等我贈埋你有乜研究；
等你有口能應付，但係切不可招尤。
(白)
記住，記住，
(花)
第一忌搬是搬非，
第二忌莫過心唔對口；
(白)
出嚟食要講咀頭，待本神仙，贈埋你個口，死都講番生，聲聲老友，一經受落，你就猛拍膊頭，(大喝介) 變，記得口浪豬油，要夠曬棹頭，唔好亂指西游呀，嚇 (笑曰) 嘻嘻，好嘢啩
(賣相思)
記得我嘅事情你咪洩漏，
致把天機識透，
你有口應識昆馬，
充正上流，
我問你復何求，
立即開嚇口，
我是個神人，
不過下山安步雲遊
(中板)
我叫一句稻草人，
而家你仙緣雖有，
若到人間揾食，
啲功夫都未入流。
有的食飯神仙，
又話銀樹可以開花，
不過志在騙財，
引玉拋磚唯利誘；
至緊要第一戒貪，
第二要對人和氣，
第三緊記色字有把刀在頭。
(花)
喂，至堅要忠忠實實去做人，
就不至行前俾人講後；
(白)
咁你聽到未呀，
稻草人: (白)
聽到
肥神: (白)
你聽到乜嘢，睇唔睇到嘢，
稻草人: (白)
睇到添，
肥神: (白)
重睇到添，好好，睇到乜嘢呀，
稻草人: (白)
睇到天地好大，
肥神: (白)
好，等我考嚇你至得，咁系聞到啲嘢未呀，菜嘅味道同花嘅味道有乜嘢分別有冇呀，
稻草人: (白)
肥神仙，乜的花同啲菜都有味道嘅咩，
肥神: (白)
乜冇呀，乜嘢都有味道嘅，有香有臭丫嗎，
稻草人: (白)
我話冇，
肥神: (白)
哈哈，原來我自己傻瓜唔係佢，佢都未曾有鼻系道，難怪難怪，好，唔計帶，等我送埋個鼻畀你又點話，(喃喃念白) 能分香臭，全靠個鼻，靠索靠聞，焉能無鼻，阿崩掹鼻，大吉大利，急急如律令 (大喝) 哈，而家你五官都齊全吖哪，
(南島春光)
鼻鼻鼻，
若冇鼻實最忌，
吸收芬芳辨五味，
鼻冇實最悲，
確嘥心機，
豬也有鼻狗也有鼻，
有鼻至有味，
香臭辨明，
只靠個鼻聞，
天意做成，
一切有用途，
全冇神秘
(白)
你而家聞到嘢未，
稻草人: (白)
聞到叻，啲花就香嘅，菜就臭臭地嘅，
肥神: (白)
唓，唔係的菜臭，根本啲菜本身冇臭，所謂臭者，就係瀨嗰的肥料落去，肥料臭啫，臭完佢就香嘅叻，嗰的花呢，香完又會臭個播，
稻草人: (白)
乜咁㗎，
肥神: (白)
當然啦，
(長二王下句)
啲世事確兒嬉，
人生如做戲，
有香然後有臭，
絕不為奇，
有臭至有香，
豈無此理，
香完又臭，
臭完又香兩樣不離。
(二王短序)
香香臭臭講時期
(接唱二王)
所謂得運一條龍，
失運要掹人衫尾；
(白)
稻草人，稻草人，而家你覺得的花香，但係佢開殘之後，的枝枝葉葉俾風吹雨打嘔嘔埋埋咁就黴，黴咗嗰就臭啦，
稻草人: (白)
哦，
肥神: (白)
嗱，我有樣吩咐你呀，你個鼻實在好危險，好危險叻，
稻草人: (白)
點解呀，
肥神: (白)
你要會運用至得，只許聞，不許索，如果你索油呢，一嚇就會索著火水叻，就會惹火焚身，記得嗎，
稻草人: (白)
記得，
肥神: (白)
咁你會唔會索油呀你實在，
稻草人: (白)
唔會，
肥神: (掹白)
唓，乜你而家變咗人，重咁古板㗎你，
(賭仔自嘆)
共你傾得咁熟，
咪笨似一碌木，
直腸直肚真正木獨，
(插白)
咪我問一句你答一句得㗎
(接唱)
運用口材凡事要醒目，
巧變靈機采風與問俗，
最令人討厭咪周身焗宿，
(插白)
出嚟撈把口好緊要㗎
(接唱)
咁樣定俾人笑你大懵兼阿福，
雖則你並冇受教育，
但有神仙助，
運到天賜福，
仙家妙術令你心滿足，
(插白)
你最緊要咪口花花得罪人呀
(接唱)
今番點醒你，
學嘢要急促，
逢人稱做伯叔，
咁至令佢心舒服
(白)
知道嗎，個把口生嚟講嘢嘅，你要識利用佢，不能話好似木頭咁問一句答一句咁密實嘅，而家你做咗人咯噃知嗎，
稻草人: (白)
肥神仙，你唔好鬧我咋，點解，人就有靈感同聰明嘅，我而家靈感同聰明都冇，我點算得係人呢，點識同你講咁多嘢，對答如流呢，
肥神: (白)
嚇，系又係道理，唔爭在賜埋的靈感聰明俾你又點話，好似人地公司大減價，大贈送又話跳樓貨咁樣，唔相干，本神仙慈悲為懷，更加冇計嘅，(念白) 雖有五官，依然未足，人冇靈感，等如草木，人冇聰明，等於阿福，兩樣賜埋，等你聰靈絕俗，急急如律令，變，哈哈哈，你而家有聰明靈感啦啩，
(滿場飛)
嚟叻企定咪亂咗性，
一有靈時就會變精，
就變精，
你要熟性訓導聽，
今番巳似人形，
(插白)
喂，你現時乜都有叻，可以出去問世自立，唔係靠嚇幾隻雀仔嚟過日，咁唔得噃
稻草人: (白)
我知叻，你估重一舊飯系田度嚇雀咁笨呀，呢白的等耕田佬自己做番都得叻，
肥神: (白)
講嘢叻咗
稻草人: (接唱)
呢的乜嘢聲，
呢的乜嘢聲，
肥神: (接唱)
一陣雀聲，
一隊雀影，
稻草人: (接唱)
俾佢大叫吱喳催喚我醒，
腹中見餓好似雷鳴，
(白)
揾幾隻雀仔食嚇至得，咪走呀，
肥神: (白)
嘩，乜佢一有咗靈感聰明，大開殺戒，得了，喂，食一隻好咯重食，哎呀，睇佢手又血，口又血，點攪呀，
稻草人: (大笑白)
哈哈哈，好嘢呀
(接唱)
古人都有話食色性也，
肚餓難捱實係惡頂，實係惡頂，
佢食殼我食佢，
咁樣夠最公正，
(白)
又一隻，哎呀，好味道呀，好甜呀，
肥神: (插白)
嘩，重話好味道，喂，食完一隻又一隻，連毛夾屎吞，好咯，陰功呀陰功呀，哎吔，殘忍咯，你食唔食
(接唱)
真係死俾過你睇，
死俾你睇，
真係要吊頸，
真係要吊頸，
睇佢逐只生吞真係氣頂，
你把的雀殺害兇惡絕情，
稻草人: (接唱)
我原本是未識性，
得你埋嚟我學到精，
學到精，
肥神: (接唱)
你快立正，
快立正，
休得咁不恭敬
(白)
企住，
稻草人: (白)
乜企住，剝你的衫，剝你的衫，
肥神: (白)
喂，喂，乜你咁都得㗎，嘩，喂，乜除咗我件神仙袍，咁點得嘅，
稻草人: (白)
乜嘢唔得呀，你有我冇就要搶啦，
肥神: (白)
原來系咁，
(快花)
做乜你一有人性，
就好似馬騮甩繩。
居然斷搶太橫蠻，
知否人間法律嚴刑訂；
稻草人: (白)
你快啲除囉你，
(花)
有衣穿著能溫暖，
我無衣穿著冷如冰。
衣食住，
若不公平，
怎怪人間難安靜；
肥神: (白)
稻草人，你斷搶咁點得呢，好彩我肥神仙系男性啫，如果我係女神仙，唔係領曬你嘢，你想衣食住好容易解決啫，只要係肯付出你嘅勞力求進取，咁就唔慌冇㗎啦，
稻草人: (白)
哦，咁我去邊度求進取呀，肥神仙，
肥神: (白)
你真係傻梗，天地之大，四方可求，咁唔係去得，去啦，
稻草人: (白)
好，咁又好，聽嚇你話，四圍盪嚇至得，
肥神: (白)
嘩，弊叻，呢個嘢我而家稔落，佢衰系衰在盪字，嫖賭飲盪吹，就係盪字都幾壞，睇你點盪法，步步尺七，鉤梗你尾，
稻草人: (白)
嚇，神仙，神仙，你睇嚇，行緊來個大姐幾正
(唱花鼓芙蓉)
佢最靚嗰對秋波，
腰圍真纖瘦，
佢好比風前楊柳，
最攞命系一笑回眸，
(浪白)
成個啜核荔枝咁，冇得彈，
(接唱)
個邊又有飛妹，
生來好靚溜，
(白)
睇嚇神仙，
(接唱)
真係玲瓏曲線，
堪稱健美之流，
肥神: (白)
哎吔，我冇落到鹽，佢都咁咸呢，
稻草人: (接唱)
世上美嬌姿，
有若花團錦繡，
喑盼諧鸞鳳，
又何妨隨尾後
(白)
喂，大姐唔駛走嘅，
(唱龍飛鳳舞)
嚟啦，小姐你勿怕醜嚟啦，
嚟啦，手挽手共暢遊，
大姐，你挽左佢挽右，
大姐，想按摩我力夠，
肥神: (白)
搶呀，搶呀，
(續唱)
見佢索嘢作風如地貓，
佢太過冇禮最衰嗰把口，
稻草人: (接唱)
喂，嫁我帶你太空渡蜜月，
食嘅著嘅你想要我就有
肥神: (白)
哎吔，咁都抵佢做人嘅，真係越睇越起火，真係重笑添呀，
(逍遙樂)
佢見美起心立亂吼，
冤冤氣氣實難受，
一見就欲上手，
太過披猖似跟尾狗，
(插白)
一日都係我自己錯，哎，呢趟闖禍啦，
稻草人: (接唱)
完全為美色所誘，
死追猛跟未怕醜，
(白)
等埋我呀大姐，
肥神: (接唱)
見佢就作嘔，
因乜得咁下流，
(插白)
咁都攪得掂嘅，唔得不成世界
(接唱)
曳極無術救，
枉我用心仁義厚
(白)
咪叻，咪叻，呢嗰嘢都係唔得嘅，等我要定身法定住佢先，急急如律令 (大喝介) 定，
稻草人: (白)
哎吔，肥神仙呀，點解你用定身法定住我呀，我唔鬱得喎，
肥神仙: (白)
嘩，俾你行重得了麼，嗰陣唔駛出熱頭囉，烏天暗地呀成日，咪鬱
(禿頭中板)
而家我要逐樣收番，
初到太平山下，
第一次就賣錯了人情。
先將你把口來收，
免至你嘴利牙尖，
任意去傷殘小生命；
我重要收番你對鬼鼠眼，
免至你耽耽虎視，
一見到女人就望過不停。
更要收埋你對耳仔添，
免得你耳聽八方，
終日去捕風捉影；
呢你最衰個個白鼻哥，
不止話巳聞呢脂粉味，
更兼索著血腥。
我重要收番你點聰明，
估唔到人有聰明，
呢就會妄開殺性；
終日搞到明火打劫，
弱肉強食，
無怪嗰個世界冇日安寧。
(七字清)
神仙初下凡塵境；
我方知凡人有陣會錯用假聰明。
造物創人原純正；
又點知頻綿烽火永不停。
天上安閒我致有肥得挓挓令；
若果在人間留戀，容乜易瘦到我變只馬騮精。
(催快)
遊戲人間留話柄；
連忙覆命返天庭。
善惡到頭終報應；
爭名奪利為何情。
但只願他日重來，一新視聽；
只見人心皆向善，嗰陣自會天下太平。