报答 - 拉吉
གཞས་ཚིག རུ་དམ་སྐལ་བཀྲ།
གཞས་དབྱངས། རྫོགས་ཆེན་བསྟན་འཛིན།
གླུ་གཞས་ཁྱབ་སྤེལ། ཤེར་བསྟན་འཕྲིན་སྟེགས་ལས་སྒྲུབ་ཁང་།
ལོ་ཆུང་བྱིས་པའི་ལུས་སེམས་ཕྲ་མོ།
སྤང་ལ་མེ་ཏོག་བཞད་པ་འདྲ་བྱུང་།
དྲིན་ཆེན་ཕ་མ་ཁྲི་གདུགས་ཉི་མ་འདྲ།
དྲོ་སྐྱིད་ཀློང་ནས་གསོས་པ་དྲན་ན།
ང་ཚོ་ག་པ་གང་དུ་ཡོད་ཀྱང་།
སྤྲོ་སྣང་ངང་ནས་དྲིན་ལན་ཡང་ཡང་ཞུ་ཡོང་།
བློ་ཆུང་བྱིས་པའི་སྣང་བ་ཕྲ་མོ།
ནག་ལ་སྤྲེའུ་ཉུལ་བ་འདྲ་བྱུང་།
དྲིན་ཆེན་མིང་སྲིང་ལྷ་ཡི་གར་པ་འདྲ།
རྩེད་འཇོ་ཀློང་ནས་གསོས་པ་དྲན་ན།
ང་ཚོ་ག་པ་གང་དུ་ཡོད་ཀྱང་།
སྤྲོ་སྣང་ངང་ནས་དྲིན་ལན་ཡང་ཡང་ཞུ་ཡོང་།
སློབ་ཆུང་བྱིས་པའི་བློ་རིག་ཕྲ་མོ།
ཞིང་ལ་མྱུ་གུ་འཁྲུངས་བ་འདྲ་བྱུང་།
དྲིན་ཆེན་དགེ་རྒན་སྤྲིན་པ་དཀར་པོ་འདྲ།
ཆར་ཟིམ་ཀློང་ནས་གསོས་པ་དྲན་ན།
ང་ཚོ་ག་པ་གང་དུ་ཡོད་ཀྱང་།
སྤྲོ་སྣང་ངང་ནས་དྲིན་ལན་ཡང་ཡང་ཞུ་ཡོང་།