དེ་དུས་ཀྱི་ཁྱེད།
གཞས་ཚིག རག་ཤི་ཀརྨ་བསམ་གཏན།
གཞས་མ། ཕུར་བུ་སྒྲོལ་མ་།
ལམ་ལ་འགྲུལ་མྱོང་བའི། ཁ་སང་གི་རོགས།
སེམས་ལ་དྲན་མྱོང་བའི། དེ་དུས་ཀྱི་ཁྱེད།
ལུས་ཀྱི་བར་ཐག་ཆོད་ཚར་ཡང་།
སེམས་ཀྱི་བར་ཐག་ནམ་ཆོད་འགྲོ།
ཕལ་ཆེར་ཚེ་སྔོན་ཆད་པའི་བུ་ལོན་ཡིན་འགྲོ།
ཤར་ཡོང་བ་བཅོ་ལྔའི་ཟླ་བ།
དྲན་ཡོང་བ་ཁྱེད་ཀྱི་ཞལ་རས།
ཟླ་འོད་མཚོ་ལ་ཕོག་པའི་དུས།
གཏམ་རྒྱུད་ཞིག་གི་སྙན་ངག་གྱེར།
ཕལ་ཆེར་ཚེ་སྔོན་ཆད་པའི་བུ་ལོན་ཡིན་འགྲོ།
མཉམ་དུ་འགྲུལ་མྱོང་བའི། ཁ་སང་གི་རོགས།
སྙིང་ལ་ཟུག་མྱོང་བའི། དེ་དུས་ཀྱི་ཁྱེད།
ཁ་ཡི་སྐད་ཆ་མེད་ཚར་ཡང་།
ཉལ་བའི་རྨི་ལམ་ནམ་་ཡལ་འགྲོ།
ཕལ་ཆེར་ཚེ་སྔོན་ཆད་པའི་བུ་ལོན་ཡིན་འགྲོ།
ལྷུང་ཡོང་བ་སྟོན་ཁའི་ལོ་མ།
འཁོར་ཡོང་བ་མིག་གི་འཆི་ཞགས།
སྡོང་ལོ་ས་ལ་ལྷུང་བའི་དུས།
གཏམ་རྒྱུད་ཞིག་གི་རྫོགས་ཚིག་བྲིས།
ཕལ་ཆེར་ཚེ་སྔོན་ཆད་པའི་བུ་ལོན་ཡིན་འགྲོ།